2025-nji ýylyň oktýabr aýynda Aşgabat şäherinde Ykdysady hyzmatdaşlyk boýunça türkmen-rus Hökümetara toparynyň nobatdaky mejlisi geçiriler. Bu barada  Russiýanyň Türkmenistandaky ilçisi Iwan Wolynkin Türkmenistanyň Garaşsyzlyk güni mynasybetli gutlag hatynda belledi diýip, Russiýanyň Türkmenistandaky ilçihanasynyň metbugat gullugy şenbe güni habar berdi.

Ilçi ikitaraplaýyn gatnaşyklarynyň işjeň ösýän şertlerinde gazanylan oňyn depgini saklamagyň we berkitmegiň möhümdigini belläp, şu mejlisiň hem bu ugurda giň mümkinçilikleri açýandygyny nygtady.

“Biziň döwletlerimiziň ýolbaşçylarynyň arasynda ynamly gatnaşyklaryň ýola goýulmagy aýratyn guwandyryjy ýagdaý bolup, ol ikitaraplaýyn gatnaşyklary has-da üstünlikli ösdürmäge berk kepillik berýär” diýip, diplomat öz gutlagynda belledi.

Ykdysady hyzmatdaşlyk boýunça türkmen-rus Hökümetara toparynyň 12-nji mejlisi 2022-nji ýylyň 7-nji dekabrynda Moskwada geçirildi.