Eýranyň Golestan welaýatynda Türkmenistanyň eksport harytlarynyň sergisi üstünlikli geçirilenden soňra, Golestan welaýatynyň hökümeti Türkmenistanda öz harytlarynyň sergisini geçirmegi meýilleşdirýär diýip, welaýatyň häkiminiň orunbasary Abdul Ali Kian Mehr belledi. Bu barada Eýranyň “Mehr” agentligi sişenbe güni habar berdi.

Geljekki iki–üç aýyň içinde geçirilmegi meýilleşdirilen bu çäre Aşgabat şäherinde ýa-da Balkan welaýatynda guralar we ikitaraplaýyn ykdysady hem-de medeni gatnaşyklary berkitmekde möhüm ädim bolar.

Welaýatyň häkiminiň orunbasarynyň bellemegine görä, sergi söwda gatnaşyklaryny giňeltmäge we özara söwdanyň möçberini 30 göterim artdyrmaga mümkinçilik berer.

Habarda bellenilişi ýaly, serhetýaka infrastrukturanyň ösdürilmegi hem-de Eýran bilen Türkmenistanyň söwda-senagat edaralarynyň bilelikdäki tagallary durnukly ykdysady hyzmatdaşlygyň we sebitleýin integrasiýanyň binýadyny döredýär.

Şeýle-de, 2025-nji ýylyň 5–7-nji maý aralygynda Eýranyň Gürgen şäherinde Türkmenistanyň harytlarynyň giň möçberli sergisi geçirildi.