Türkmenistanyň wekiliýeti aragatnaşyk ministriniň orunbasary Berdi Berdiýewiň ýolbaşçylygynda Dubaýda geçirilen halkara tehnologiýa sergisi we maslahaty “GITEX Global 2025”-e (13-16-njy oktýabr) gatnaşdy. BAE Telekommunikasiýa we sanly döwlet dolandyryş ulgamyndaky düzgünleşdiriş agentliginiň (TDRA) çakylygy boýunça guralan sapar, Emirlikleriň sanly özgertmeler tejribesini öwrenmäge gönükdirildi.

Türkmen wekilleri BAE-niň täze sanly başlangyçlary bilen tanyşyp, Esasy hökümet pawilýonyna, şeýle hem TDRA we Digital Dubai-niň stendlerine baryp gördüler, telekommunikasiýa we kiberhowpsuzlyk ulgamyndaky öňdebaryjy tejribelere üns berdiler.

Esasy pursat, Emirlik düzümleriniň ýolbaşçylary, şol sanda Dubaýyň maglumatlar we statistika merkeziniň baş direktory Ýunus Al Naser we TDRA-nyň baş direktory Majit Sultan Al Mesmar bilen resmi gepleşikler boldy.

Taraplar maglumat dolandyryşy we bulut tehnologiýalary, kiberhowpsuzlyk we sanly döwlet hyzmatlaryny ösdürmek, şeýle hem ýokary hünärli IT-hünärmenlerini taýýarlamak ýaly ileri tutulýan ugurlar boýunça hyzmatdaşlyk mümkinçiliklerini ara alyp maslahatlaşdylar.

Dialogy ösdürmek maksady bilen, türkmen tarapy Digital Dubai we TDRA-nyň wekiliýetlerini 12-14-nji noýabrda Aşgabatda geçiriljek "Türkmentel-2025" halkara sergisine we maslahatyna gatnaşmaga çagyrdy.

Forumyň çäklerinde sanly hökümet we kiberhowpsuzlyk meseleleri boýunça ikitaraplaýyn ara alyp maslahatlaşmalary geçirmek teklip edildi. Emirlik tarapy tejribe alyşmaga we sanly innowasiýalar ulgamynda hyzmatdaşlygy pugtalandyrmaga taýýardygyny bildirdi.

Çeşme: THP