Amerikanyň Birleşen Ştatlarynyň Nýu-Ýork şäherinde ýerleşýän Birleşen Milletler Guramasynyň ştab-kwartirasyndan Türkmenistana hoş habar gelip gowuşdy. Ol 14-nji oktýabrda BMG-niň Baş Assambleýasynyň 80-nji sessiýasynyň 18-nji plenar mejlisiniň dowamynda “Awaza syýasy Jarnamasy” atly Kararnamanyň biragyzdan kabul edilendigi baradaky habardyr. Bu Kararnama şu ýylyň awgust aýynda “Awaza” milli syýahatçylyk zolagynda üstünlikli geçirilen BMG-niň Deňze çykalgasy bolmadyk ösüp barýan döwletler boýunça üçünji maslahatynyň netijeleri beýan edilen Awaza syýasy Jarnamasy bilen baglylykda kabul edildi.

“Watan” habarlar gepleşiginde aýdylyşy ýaly, Türkmenistanyň Ministrler Kabinetiniň şu gün sanly ulgam arkaly geçirilen nobatdaky mejlisinde wise-premýer, daşary işler ministri R.Meredow hasabatynda bu hoş habary döwlet Baştutanyna ýetirip, tüýs ýürekden gutlaglaryny beýan etdi.

Türkmenistanyň Prezidenti Serdar Berdimuhamedow mejlisde Hökümet agzalaryna ýüzlenip, BMG-niň bu Kararnamany kabul etmeginiň awgust aýynda Awazada ýokary derejede geçirilen maslahatyň uly ähmiýetini ýene bir gezek tassyklaýandygyny nygtady. 

“Birleşen Milletler Guramasyna agza ýurtlaryň köpüsiniň bu Kararnamany goldamagy, köpsanly ýurtlaryň awtordaş bolup çykyş etmegibiziň üçin uly abraýdyr” diýip, döwlet Baştutany aýtdy.

Türkmenistanyň Prezidenti Ministrler Kabinetiniň agzalaryny hoş habar bilen gutlady.

Maglumat üçin belläp geçsek, şu ýylyň awgustynda geçirilen BMG-niň Deňze çykalgasy bolmadyk ösüp barýan döwletler boýunça üçünji maslahatyna gatnaşmak üçin 104 döwletden, 46 halkara guramadan wekiliýetler Awaza sapar bilen geldiler.

BMG-niň maslahatynyň çäklerinde plenar mejlisleriň 6-sy, ýokary derejeli “tegelek stol” duşuşyklarynyň 5-si, forumlaryň 7-si hem-de ugurdaş çäreleriň 40-a golaýy geçirildi. Halkara maslahatyň netijeleri boýunça Awaza syýasy Jarnamasy, şeýle-de Deňze çykalgasy bolmadyk ösüp barýan döwletler üçin 2024 – 2034-nji ýyllar boýunça Hereketleriň Awaza maksatnamasy kabul edildi.