Türkmenistanyň Ministrler Kabinetiniň Başlygynyň orunbasary Hojamyrat Geldimyradow Gazagystan Respublikasynyň Premýer-ministriniň orunbasary – milli ykdysadyýet ministri Serik Žumangarin bilen duşuşdy. Duşuşykda “ýaşyl geçelgäniň” çäginde gök önümleriň we miweleriň iberilişiniň giňeldilmegini maslahatlaşyldylar. Bu barada sişenbe güni Gazagystan Respublikasynyň Premýer-ministriniň resmi metbugat gullugy habar berdi.

Serik Žumangarin Gazagystanyň Türkmenistana bugdaý ununy, günebakar ýagyny, bugdaýy, makaron önümlerini, margarin we çaý konsentratlaryny ibermegini dowam etdirýändigini belledi. Şunuň bilen baglylykda, eksporty giňeltmegi teklip etdi we onuň içine mekgejöwen, merjimek, nohut, soýa nohutlary, şeker we beýleki azyk harytlaryny goşmagy teklip etdi.

Türkmenistan tebigy gazdan başga-da Gazagystana gök önümlerini we miweleri iberýär. Şu ýyl pomidoryň importy 30 müň tonnadan geçdi. Bu bolsa pomidoryň Türkmenistandan iberilýän harytlaryň arasynda mukdary boýunça ikinji orny eýeleýändigini görkezýär diýip, Serik Žumangarin belledi.

Duşuşygyň dowamynda logistika ulgamyny ösdürmek meseleleri hem ara alnyp maslahatlaşyldy. Hojamyrat Geldimyradow Hyrat bilen serhetde gurulýan gury ýer porty barada maglumat berdi we Gazagystany bu taslama gatnaşmaga çagyrdy.

Taraplar Gazagystan – Türkmenistan – Owganystan – Pakistan üstaşyr ugrunyň, şol sanda Hyrat – Turgundy demir ýolunyň gurluşygynyň mümkinçiliklerini ara alyp maslahatlaşdylar.

Duşuşygyň ahyrynda taraplar söwda, ulag we logistika gatnaşyklaryny giňeltmegi hem-de işewürlige goşmaça ýeňillikleri döretmegi dowam etdirmägä ygrarlydyklaryny bellediler.

Şu ýylyň dokuz aýynda Türkmenistan bilen Gazagystanyň arasynda oba-hojalyk önümleriniň söwdasy 103 million ABŞ dollaryna ýetdi, geçen ýylyň degişli döwri bilen deňeşdirilende 37,5% ýokarlandy.