Türkmenistanyň hemişelik Bitaraplygynyň 30 ýyllygyna bagyşlanyp, 1-nji dekabrdan ýurduň Merkezi banky modifisirlenen 1, 5, 10 manatlyk polimer banknotlary, şeýle hem ilkinji gezek täze 200 manatlyk polimer banknoty dolanyşyga girizýär.

Merkezi bankyň metbugat beýanatynda habar berlişi ýaly, täze görnüşdäki pullaryň esasy aýratynlygy — hapalanma, könelme, zeperlenme ýaly daşky täsirlere durnuklylygydyr. Banknotlaryň gorag elementleri güýçlendirilip, hakykylygyny anyklamaga mümkinçilik berýän şekiller hem kämilleşdirildi.

1, 5 we 10 manatlyk banknotlaryň reňki hem-de şekilleri üýtgewsiz galýar, diňe Halkara parahatçylyk we ynanyşmak ýylynyň nyşany goşuldy.

Täze 200 manatlyk banknotda öň tarapynda “Arkadag” binasy, arka tarapynda Arkadag şäher häkimliginiň binasy ýerleşýär. Täze banknotyň ýüz tarapynda olaryň çykarylan senesi, Türkmenistanyň Merkezi bankynyň müdiriýetiniň başlygynyň golunyň faksimilesi görkezilýär.

Bu banknotlar Türkmenistanyň çäginde ähli edara-kärhanalar tarapyndan tölegleriň ähli görnüşleri boýunça hökmany kabul edilmelidir. Türkmenistanyň Merkezi bankynyň 2009-njy, 2012-nji, 2014-nji, 2017-nji, 2020-nji ýyllaryň nusgasyndaky ähli banknotlary Türkmenistanyň çäginde kanuny töleg serişdesi bolmagynda galýar.