Birleşen Arap Emirlikleri Türkmenistan bilen söwda dolanyşygyny iki esse artdyrmagy meýilleşdirýär. Bu barada BAE-niň Türkmenistandaky Adatdan daşary we Doly ygtyýarly Ilçisi Ahmed Al Haý Al Hameli ýurdunyň Garaşsyzlygynyň 54 ýyllygyna bagyşlap “Neýtralnyý Türkmenistan” gazetine beren interwýusynda belläp geçdi.

2024-nji ýylda iki ýurduň arasynda (nebit söwdasy hasaba alynmazdan) söwda dolanyşygynyň möçberi 1,759 milliard ABŞ dollaryna barabar boldy. Bu görkeziji 2023-nji ýyl bilen deňeşdirilende 75 göterim ýokarydyr.

2025-nji ýylyň dokuz aýynyň netijeleri boýunça Türkmenistan BAE-niň söwda hyzmatdaşlarynyň arasynda üçünji orunda durýar.

Diplomatyň bellemegine görä, şu ýylyň dowamynda ilçihana iki ýurduň arasyndaky gatnaşyklary, aýratyn-da energetika pudagyndaky hyzmatdaşlygy giňeltmäge uly üns berdi.

Iki ýurduň arasyndaky gatnaşyklar yzygiderli ösýär, munuň mysaly hökmünde şu ýylyň maý aýynda XRG “Türkmennebit” döwlet konserni, “Hazarnebit” döwlet kärhanasy we PETRONAS kompaniýasy bilen Hazar deňziniň türkmen bölegindäki 1-nji blogunda Önümi paýlaşmak baradaky baglaşylan ylalaşygy görkezmek bolar diýip, ilçi belledi.

Şeýle hem XRG, Petronasyň kompaniýalaryň we “Türkmengaz” döwlet konserniň arasynda gazy uzak möhletleýin satmak boýunça ylalaşyk baglaşyldy.

Ulag pudagynda “Etihad Railway” bilen Türkmenistanyň Demir ýol ulaglary ministrliginiň arasynda özara düşünişmek hakyndaky Ähtnama gol çekildi.

Oktýabr aýynda Şarjanyň Söwda-senagat edarasy tarapyndan ikinji Türkmenistan-BAE ikinji işewürlik forumy geçirildi. Ol ýerde iki ýurduň işewürleri we söwda-senagat edaralarynyň ýolbaşçylary birnäçe duşuşyklary geçirdiler.

2025-nji ýylyň 24-nji noýabrynda Abu-Dabiniň Milli Nebit Kompaniýasy (ADNOC) Türkmenistanyň paýtagty Aşgabat şäherinde täze edarasyny açdy.