Türkmenistanyň Zenanlar birleşiginiň Merkezi geňeşiniň, Kärdeşler arkalaşyklarynyň Milli merkeziniň hem-de ÝUNESKO-nyň işleri barada Türkmenistanyň Milli toparynyň Sekretariatynyň bilelikde yglan eden «Gülüň owadan!» atly bäsleşiginiň Balkan welaýaty boýunça tapgyry geçirildi.

«Türkmenistan» gazetinde berilýän habara görä, Balkan welaýat häkimliginiň, Zenanlar birleşiginiň welaýat bölüminiň hem-de Kärdeşler arkalaşyklarynyň welaýat birleşmesiniň bilelikde guramaklarynda Balkanabat şäherindäki «Türkmeniň ak öýi» binasynyň öňündäki meýdançada geçirilen çärä günbatar sebitiň etraplaryndan we şäherlerinden deslapky gözden geçirilişlerde öňe saýlanan toparlar ýokary ruhubelentlikde gatnaşdylar. Bu ýerde el işleriniň sergisi, sungat ussatlarynyň ýerine ýetirmeklerinde ýaňlanan aýdym-sazlar, folklor toparlarynyň çykyşlary boldy.

Bäsleşikde Türkmenbaşy etrabynyň 1-nji hem-de 2-nji orunlara mynasyp bolan toparlary onuň ýurt derejesindäki jemleýji tapgyrynda çykyş etmek hukugyna eýe boldular.