Tomus paslynyň häzirki günlerinde Daşoguz welaýatynda gowaçalara suw tutmak, olary mineral dökünler bilen iýmitlendirmek, hapa-haşal otlardan arassalamak ýaly möwsümleýin işler agrotehniki kadalara laýyklykda alnyp barylýar. Bu barada «Türkmenistan» gazetinde habar berildi.

Habarda bellenilişi ýaly, demirgazyk welaýatyň pagtaçy ýer eýeleri şu ýyl gowaça ekilen 140 müň gektar meýdandan 275 müň tonna hasyl ýetişdirmegi maksat edinýärler. Bejergi işlerinde dürli kysymly traktorlaryň 2 müňden gowragy sazlaşykly ulanylýar. Tehniki hyzmatyň guramaçylykly ýola goýulmagy gowaçalaryň kadaly hasyl toplamagyna oňaýly täsir edýär.

Welaýatyň Şabat, Görogly, Akdepe etraplarynda bol hasyl ýetişdirmegiň esasy şertleri bolan hatarara bejergisini geçirmek, boýy ýetýän gowaçalara suw bermek işleriniň depgini günsaýyn ýokarlanýar. Akdepe pagtadan iň ýokary hasyl alynýan etrap hasaplanýar. Bu ýerde edermen pagtaçylaryň asylly zähmeti bilen, 32 müň gektar meýdana tohum sepilip, oňat gögeriş alyndy. Şu ýyl etrap boýunça 61 müň 100 tonna pagta öndürmek göz öňünde tutulýar.

Etrabyň 20-den gowrak daýhan birleşiginiň, 200 sany daýhan hojalygynyň meýdanlarynda şu günler bejergi traktorlarynyň 300-den gowragy bökdençsiz işledilýär.

Welaýatyň Şabat etrabynyň S.Rozmetow adyndaky oba hojalyk paýdarlar jemgyýetiniň kärendeçileri gowaça ekilen 7 müň 300 gektar meýdandan 14 müň 600 tonna hasyl almagy maksat edinýärler. Daýhançylygyň ozaldan dowam edip gelýän ýörelgeleri häzirki döwrüň innowasion usullary bilen utgaşykly alnyp barylýar.

Köneürgenç etrabynyň «Akgala», Görogly etrabynyň Magtymguly adyndaky, Boldumsaz etrabynyň «Döwletli», Şabat etrabynyň «Bossan» daýhan birleşiklerinde hem hasylyň berekedine bereket goşýan agrotehniki çäreler göwnejaý geçirilýär.