Türkmen kompaniýalary Moskwa şäherinde 11 – 14-nji mart aralygynda geçiriljek “RosBuild 2025” atly gurluşyk pudagynyň sergisine gatnaşarlar. Ol türkmen işewürlerine öz önümleri bilen tanyşdyrmaga we Russiýanyň gurluşyk düzümleri bilen gatnaşyklary ýola goýmaga mümkinçilikleri döreder. 

Russiýanyň Türkmenistandaky ilçihanasy türkmen telekeçilerini degişli ugurda 400-den gowrak kompaniýanyň, 19 müň hünärmeniň we 4 müň sany hem dürli wekiliň gatnaşmagyna garaşylýan “RosBuild 2025” atly gurluşyk pudagynyň sergisine gatnaşmaga çagyrdy. Bu barada Türkmenistanyň Senagatçylar we telekeçiler birleşmesi habar berýär. 

Onda türkmen önüm öndürijileri özleriniň harytlary bilen tanyşdyrarlar we täze işewürlik hyzmatdaşlygy ýola gomak maksady bilen “B2B” görnüşdäki eksport gepleşiklerine gatnaşarlar. 

2019-njy ýylda geçirilip başlanylan “RosBuild” sergisi Russiýanyň gurluşyk pudagynda möhüm ähmiýetli çäredir. Täze gurluşyk serişdeleri we tehnologiýalary bilen tanyşdyrýan, özara gatnaşyklary ýola goýmak we işewürlik ylalaşyklary baglaşmak üçin ähmiýetli mümkinçilikleri döredýän bu sergu dünýäniň ähli ýerinden degişli ugurdaky hünärmenlerini bir ýere jemleýär.