Golaýda Türkmenistanyň Daşky gurşawy goramak ministrliginde Köýtendag (Türkmenistan) we Surhan (Özbegistan) goraghanalaryny serhetüsti ÝUNESKO-nyň Bütindünýä mirasynyň sanawy hökmünde hödürlemek bilen baglanyşykly duşuşyk guraldy. Bu barada ministrligiň resmi saýtynda habar berildi.

Duşuşyga Maýkl Zukkowyň Tebigaty goramak gaznasynyň (MSF, Germaniýa), Uly landşaftlary goramak saklamak merkeziniň (CLLC, ABŞ), Slowakiýanyň speleologiýa jemgyýetiniň, Kot d'Azur fransuz uniwersitetiniň, Özbegistan Respublikasynyň Ekologiýa, daşky gurşawy goramak we howanyň üýtgemegi ministrliginiň, Surhan döwlet goraghanasynyň, şeýle-de iki ýurduň ylmy jemgyýetçiliginiň wekilleri gatnaşdylar.

Köýtendagy ÝUNESKO-nyň Bütindünýä mirasynyň sanawyna hödürlemek meselesi Türkmenistan üçin ileri tutulýan ugur bolup durýar we bu iş birnäçe ýyl bäri dowam edýär.

Duşuşygyň maksady Köýtendag (Türkmenistan) we Surhan (Özbegistan) goraghanalaryny serhetüsti ÝUNESKO-nyň Bütindünýä mirasynyň sanawy hökmünde hödürlemek bilen baglanyşykly meseleleri ara alyp maslahatlaşmakdan ybarat boldy.

Ilkibaşda «Köýtendag dag ekosistemasy» Guşlary goramak boýunça Korollyk jemgyýetiniň (RSPB, Angliýa) hünärmenleri bilen bilelikde işlenip düzüldi we 2015-nji ýylda ÝUNESKO-nyň Bütindünýä mirasynyň komitetine tabşyryldy. 2016-njy ýylda tehniki gözden geçirilenden soň, bilermenler Köýtendag dag ekosistemasynyň bitewiligini saklamak üçin Surhan döwlet goraghanasy bilen bilelikde transmilli nominasiýa tabşyrmagy maslahat berdiler.

2021-nji ýylda Türkmenistanyň Daşky gurşawy goramak ministrligi bilen Uly landşaftlary gorap saklamak merkeziniň (CLLC) arasynda özara düşünişmek Memorandumyna gol çekildi, onuň çäginde «Türkmenistan bilen Özbegistanyň goraghanalarynyň arasyndaky mümkinçilikleri we arabaglanyşygy ýokarlandyrmak» taslamasy durmuşa geçirilýär. Taslama Köýtendag dag ekosistemasynyň biodürlüligini gorap saklamak, goraghananyň mümkinçiliklerini artdyrmak, ylmy maglumatlary ýygnamakda goldaw bermek, bilelikdäki gözegçiligi geçirmek we Köýtendag döwlet goraghanasynda SMART barlagyny girizmek ýaly wezipeleri öz içine alýar.

Bu işleriň netijesi ÝUNESKO-nyňp Bütindünýä mirasyna dalaşgärleri taýýarlamakda uly tejribesi bolan M.Zukkow gaznasynyň hünärmenleri bilen bilelikde dalaşgärlik resminamasyny gutarnykly taýýarlamak üçin ulanylar.