Moskwada geçen Ýewraziýa Ykdysady Bileleşiginiň ýubileý sammitinde Gazagystanyň Prezidenti Kasym-Žomart Tokaýew ÝYB-niň hyzmatdaşlaryny Merkezi Aziýa bilen Aýlag ýurtlarynyň arasyndaky ulag geçelgesine goşulmaga çagyrdy.

«Aýlag bazarlaryna girmek üçin Ykdysady bileleşige agza döwletleri halkara ulag geçelgelerini döretmek baradaky Aşgabat şertnamasyna goşulmaga çagyrýarys. Gazagystan eýýäm bu şertnamanyň içinde» — diýip, Gazagystanyň Prezidenti belledi.

Prezident Tokaýewiň sözlerine görä, uzak möhletleýin integrasiýany ýola goýmagyň esasy şerti daşarky bazarlar bilen durnukly ulag aragatnaşygynyň bolmagydyr.

Eýranyň, Omanyň, Türkmenistanyň we Özbegistanyň arasynda halkara ulag we üstaşyr geçelgeleri döretmek baradaky şertnama (Aşgabat ylalaşygy) 2011-nji ýylda Aşgabatda gol çekildi. Şondan soň bolsa Gazagystan, Katar we Hindistan bu şertnama goşuldy.