Türkmenistanyň daşary işler ministri Raşid Meredow çarşenbe güni Aşgabada sapar bilen gelen Ýewropanyň halkara hyzmatdaşlyk boýunça komissary Ýozef Sikela bilen duşuşyk geçirdi. Onuň barşynda ilkinji "Merkezi Aziýa - Ýewropa Bileleşigi" sammitine we Aşgabatda geçiriljek ministrler duşuşygyna taýýarlyk meselelerine garaldy.

Taraplar Türkmenistan bilen Ýewropa Bileleşiginiň arasyndaky hyzmatdaşlygyň möhüm ugurlaryny, syýasy-diplomatik dialogyň, söwda-ykdysady medeni-ynsanperwer ugurlar boýunça hyzmatdaşlygy ara alyp maslahatlaşdylar. Bu barada Türkmenistanyň DIM-i habar berýär.

Gepleşikler hyzmatdaşlygyň şertnama-hukuk binýadyny ösdürmek, bilelikdäki gurallaryň, şol sanda parlamentara dialogyň, adam hukuklary boýunça platformasynyň alyp barýan işleri hem-de ykdysady gatnaşyklary giňeltmegiň mümkinçiliklerini öz içine aldy. ÝB-niň "Global Gateway" başlangyjynyň çäklerinde ulag, energetika we maýa goýumlar ulgamlaryndaky taslamalaryna aýratyn üns berildi.

Duşuşygyň dowamynda ykdysady howpsuzlygyň, metan zyňyndylaryny azaltmagyň, gaýtadan dikeldilýän energiýa çeşmelerini ösdürmegiň meselelerine garaldy. Diplomatlar ylym-bilim ulgamyndaky hyzmatdaşlygy, Türkmenistanyň Bütindünýä Söwda Guramasyna goşulmagynyň ÝB tarapyndan goldanylmagy bilen bagly meseleleri hem maslahatlaşdylar.