Dünýä döwletleriniň ýolbaşçylary Türkmenistanyň Prezidenti Serdar Berdimuhamedowa Nowruz baýramy mynasybetli gutlag hatlaryny iberdiler. Bu barada Türkmenistanyň resmi metbugaty sişenbe güni habar berdi.

Gutlag hatlaryny iberen ýokary derejeli ýolbaşçylaryň arasynda Hytaý Halk Respublikasynyň Başlygy Si Szinpin, Türkiýäniň Prezidenti Rejep Taýyp Ärdogan, Belarussiýanyň Prezidenti Aleksandr Lukaşenko, Palestinanyň Prezidenti Mahmud Abbas, HHR-iň Döwlet Geňeşiniň Premýeri Li Sýan, Moldowanyň Gagauziýa awtonom-çäk düzüminiň başlygy Ýewgeniýa Gusul, Türki döwletleriň guramasynyň Ýaşulular geňeşiniň başlygy Binali Ýyldyrym bar.

Gutlag hatlarynda täzelenişiň, parahatçylygyň we dostlugyň nyşany hökmünde Nowruz baýramynyň ähmiýeti nygtalyp, türkmen halkyna mähirli gutlaglar hem-de ikitaraplaýyn hyzmatdaşlygy mundan beýläk-de pugtalandyrmaga taýýarlyk beýan edilýär.

Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň adyna hem Hytaý Halk Respublikasynyň Başlygy Si Szinpinden we Türkiýe Respublikasynyň Prezidenti Rejep Taýyp Ärdogandan gutlag hatlary gelip gowuşdy. Döwlet ýolbaşçylary hatlarynda Nowruz baýramynyň we ikitaraplaýyn hyzmatdaşlygy berkitmegiň ähmiýetini nygtap, türkmen halkyna iň gowy arzuwlaryny beýan etdiler.