Türkmenistanyň Prezidenti Serdar Berdimuhamedow anna güni Samarkant şäherinde geçirilýän "Merkezi Aziýa – Ýewropa Bileleşigi" görnüşindäki birinji sammite gatnaşdy. Bu barada Türkmenistanyň resmi metbugaty habar berýär.

Merkezi Aziýada netijeli toplumlaýyn howpsuzlyk ulgamynyň döredilmegine işjeň gatnaşýan we bu ugurda möhüm orun eýeleýän Türkmenistan halkara syýasy we ykdysady giňişlikdäki abraýyny barha pugtalandyrýar. Türkmenistanyň parahatçylygy we ösüşi berkitmekdäki tagallalary ählumumy gün tertibinde ýüze çykýan meseleleriň oňyn çözülmegine ýardam edýän ýokary derejeli duşuşyklara gatnaşmagynda hem aýdyň görünýär. 

"Merkezi Aziýa – Ýewropa Bileleşigi" görnüşindäki birinji sammit, 2025-nji ýylyň 4-nji apreli, Samarkant, Özbegistan (Surat: prezident.uz)

Türkmenistanyň Prezidenti Serdar Berdimuhamedowyň sammitde eden çykyşy hyzmatdaşlygy ösdürmek we halkara giňişlikde netijeli gatnaşyklary ilerletmek üçin bar bolan mümkinçiliklerinden peýdalanmaga taýýardygynyň aýdyň mysaly boldy. 

Merkezi Aziýa döwletleriniň Baştutanlarynyň we ÝB-niň ýolbaşçylarynyň gatnaşmagynda Samarkant şäherinde geçirilýän sammit söwda-ykdysady, maýa goýum we medeni-ynsanperwer ulagmlardaky hyzmatdaşlygyň geljegi uly ugurlaryny öz içine aldy.