Türkmenistan hemişelik Bitaraplygynyň 30 ýyllygy mynasybetli dekabr aýynda Aşgabatda geçirjek halkara forumyna Birleşen Milletler Guramasynyň wekillerini resmi taýdan çagyrdy. Bu barada BMG-niň Ženewadaky edarasynyň ýanyndaky Türkmenistanyň hemişelik wekilhanasynyň metbugat gullugy habar berýär. 

Şunuň bilen baglylykda, Türkmenistanyň hemişelik wekili Wepa Hajiýew penşenbe güni BMG-niň Bosgunlaryň işi baradaky Ýokary komissary Filippo Grandi we BMG-niň Ženewadaky edarasynyň Baş direktory Tatýana Walowa bilen duşuşyklary geçirdi. 

BMG-niň Ženewadaky edarasynyň ýanyndaky Türkmenistanyň hemişelik wekili Wepa Hajiýewiň BMG-niň Ženewadaky edarasynyň Baş direktory Tatýana Walowa bilen duşuşygy, 2025-nji ýylyň 3-nji apreli, Ženewa, Şweýsariýa (Surat: BMG-niň Ženewadaky edarasynyň ýanyndaky Türkmenistanyň hemişelik wekilhanasy)

Gepleşikleriň barşynda taraplar hyzmatdaşlyk we halkara gün tertibindäki meseleleri ara alyp maslahatlaşdylar. Şeýle hem BMG-niň düzümleriniň ýolbaşçylaryna Aşgabatda geçiriljek halkara foruma gatnaşmak üçin türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň adyndan resmi çakylyklar gowşuryldy. 

Türkmenistanyň wekiliýeti şeýle hem BMG-niň Ýewraziýa ykdysady komissiýasynyň 2 – 4-nji aprelde durnukly ösüş boýunça geçiren sebitleýin maslahatyna hem gatnaşdy. Forumyň dowamynda Durnukly ösüş maksatlaryny durmuşa geçirmek, şol sanda gender deňligini, mynasyp iş şertlerini üpjün etmek, “ýaşyl” ykdysadyýete geçmek we deňiz ekoulgamyny goramak boýunça ileri tutulýan milli garaýyşlar tanyşdyryldy.