Türkmenistanyň Ministrler Kabinetiniň ýanyndaky Ulag we kommunikasiýalar agentliginiň wekillerinden ybarat türkmen wekiliýeti ýakynda Bakuwda geçirilen Aziýa bilen Ýewropanyň arasyndaky baglanyşygy gowulandyrmak üçin möhüm ähmiýete eýe bolan Merkezi Aziýa sebitinde Ykdysady hyzmatdaşlygynyň (CAREC) 2-nji geçelgesiniň ösüş strategiýasy boýunça tehniki maslahat mejlisine gatnaşdy.

Duşuşykda guramanyň işi bilen baglanyşykly meseleler ara alnyp maslahatlaşyldy, ýerine ýetirilen işler we gazanylan netijeler barada hasabat berildi.

2030-njy ýyllara CAREC ulag strategiýasynyň çäklerinde meýilnamalara hem garaldy. Mejlisiň maksady – Merkezi Aziýa sebitinde Ykdysady hyzmatdaşlygynyň 2-nji geçelgesiniň ösüşi boýunça meseleleri ara alyp maslahatlaşmak, çözgütleri tapmak we hereketleri işläp taýýarlamak, has giň manyda, CAREC sebitindäki geçelgeleriň umumy ykdysady we ulag babatda ösüşine goldaw bermek üçin degişli ministrlikleriň wekilleriniň, pudak bilermenleriniň we hyzmatdaşlaryň duşuşygydyr.

Çeşme: «Türkmenistan: Altyn asyr»