Emeli aň köp pudaklarda, şol sanda tehnologiki öwrülişigiň bosagasynda duran nebitgaz pudagynda özgerdiji güýje öwrülýär. Bu barada Türkmenistanyň ykdysadyýetine daşary ýurt maýa goýumlaryny çekmek boýunça halkara maýa goýum forumynyň (TEIF 2025) çäklerinde çarşenbe güni geçirilen “tegelek stol” maslahatyna gatnaşan bilermenler mälim etdi diýip, Türkmenistanyň resmi metbugaty habar berýär.

Habarda bellenilişi ýaly, “Emeli aňy ulanmak arkaly uglewodorod serişdelerini gazyp almagyň geljegi: nebitgaz känleriniň mümkinçiliklerini açmak” atly mejlisi “Petronas”, “Upstream”, “Ad Terra” kompaniýalarynyň, “Türkmengaz” döwlet konserniniň Ylmy-barlag tebigy gaz institutynyň, “Türkmengeologiýa” döwlet korporasiýasynyň, Nebitçi inženerleriň jemgyýetiniň (SPE) Aşgabat bölüminiň wekillerini bir ýere jemledi.

Gatnaşyjylar emeli aňyň binýadyndaky awtomatlaşdyrylan işleriň we çaklama seljermeleriniň toplumyň netijeliligini artdyrmak, eksport çykdajylaryny azaltmak, ozal elýeterli bolmadyk serişdeleri özleşdirmek üçin täze mümkinçilikleri açýandygyny nygtadylar. Maşyn güýjüni, emeli burawlaýyş ulgamlaryny ulanmak arkaly ýataklary modelirlemek, maglumatlaryň binýadynda çözgüt çykarmak hem-de uglerod galyndysyny peseltmek üçin emeli aňdan peýdalanmak we durnukly energetika pudagyny ösdürmek maslahatlaşmalaryň esasy mazmunyny düzdi.

Nebitçi inženerleriň jemgyýeti we Malaýziýanyň Nebitgaz hyzmatlary geňeşi bilen bilelikde guralan çäre energetika pudagynyň geljegini emele getirmekde innowasiýalaryň möhüm orun eýeleýändigini nygtady.

Türkmenistanyň ykdysadyýetine daşary ýurt maýa goýumlaryny çekmek boýunça halkara forum (TEIF 2025) Kuala-Lumpur şäherinde 24-nji aprele çenli dowam eder.