Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Arkadag şäheriniň ikinji tapgyrynyň çäklerinde gurulýan desgalaryň taslamalaryny synlady. Türkmenistanyň Halk Maslahatynyň Başlygy “akylly” şäheriň durnukly ösüşiniň binýadyny emele getirjek medeni-durmuş we senagat maksatly desgalarda alnyp barylýan işlere ünsi çekdi diýip, Türkmenistanyň resmi metbugaty sişenbe güni habar berdi.

Türkmen halkynyň Milli Liderine täze şäheriň seýilgähiniň taslamasynyň şekilleri görkezildi. Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetniň başlygy Derýageldi Orazowyň hasabatynda mälim edilmegine görä, ýaşyl zolaklar bilen bezelen dynç alyş, çagalar üçin gezelenç ýerleri, oturylýan ýerler we yşyklandyryjylar seýilgähiň taslamasyna girizildi.

Gurbanguly Berdimuhamedow binagärlik sazlaşygynyň, bezeg işleriniň çuň mana eýe bolmagynyň, ulanylýan serişdeleriň ýokary hilli bolmagyny üpjün etmegiň möhümdigini belledi. Şeýle hem seýilgäh zolagyny mundan beýläk-de abadanlaşdyrmak boýunça birnäçe bellikler we tekliplerdir maslahatlar aýdyldy.

Çagalar dynç alyş seýilgähi, metjidiň bezegli derwezesi, Ahalteke atlar şaýolunyň ugrundaky atlaryň heýkelleri maslahatlaşylan desgalaryň hatarynda boldy. Türkmen halkynyň Milli Lideri degişli desgalarda milli binagärlik ýörelgeleriniň we häzirki zaman şähergurluşyk ülňüleriniň utgaşmalydygyny belledi.

Saparynyň ahyrynda Gurbanguly Berdimuhamedow her bir desganyň geljegiň şäheriniň kemala gelmeginde möhüm orun eýeleýändigini nygtap, ikinji tapgyryň gurluşygynyň durmuşa geçirilişindäki işlerde üstünlikleri arzuw etdi.