Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Pariž şäherinde “Bouygues” kompaniýalar toparynyň Baş direktory Marten Buig bilen duşuşdy. Bu barada Türkmenistanyň resmi metbugaty sişenbe güni habar berdi. 

Duşuşygyň barşynda taraplar Türkmenistanyň maýa goýum gurşawynyň özüneçekijiligini nygtap, geljekki hyzmatdaşlygyň mümkinçiliklerini ara alyp maslahatlaşdylar. Şunda M.Buig kompaniýanyň Türkmenistandaky işlerini giňeltmäge gyzyklanma bildirýändigini tassyklady. 

Marten Buig şeýle hem Gurbanguly Berdimuhamedowyň öňdengörüji ýolbaşçylygynyň möhüm taslamalaryň üstünlikli durmuşa geçirilmeginde aýratyn ähmiýete eýe bolandygyny belledi. 

Türkmen halkynyň Milli Lideri Türkmenistanda infrastruktura we bilim başlangyçlaryň ösdürilmegine, şol sanda fransuz mekdebiniň gurluşygyna goşan goşandy üçin “Bouygues” kompaniýasyna minnetdarlyk bildirdi.

Duşuşygyň ahyrynda kompaniýanyň ýolbaşçysy Gurbanguly Berdimuhamedowyň Fransiýa Respublikasyna saparynyň üstünlikli geçmegini arzuw etdi.

Şeýle hem şol gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow “InterContinental Paris – Le Grand” myhmanhanasynda geçirilen Türkmen-fransuz ykdysady forumyna gatnaşdy.