Türkmenistanyň daşary işler ministri Raşid Meredow penşenbe güni Azerbaýjanyň daşary işler ministri Jeýhun Baýramow bilen telefon arkaly söhbetdeş boldy. Söhbetdeşligiň barşynda taraplar özara hyzmatdaşlygyň, sebit howpsuzlygynyň we Hazar deňzinde özara gatnaşyklaryň möhüm meselelerini ara alyp maslahatlaşdylar diýip, Azerbaýjanyň Türkmenistandaky ilçihanasy habar berýär. 

R.Meredow we J.Baýramow Türkmenistan bilen Azerbaýjanyň arasynda iki halkyň dost-doganlyk gatnaşyklarynyň taryhy arabaglanyşygyna esaslanýan hyzmatdaşlygyny berkitmegiň möhümdigini bellediler. Ministrler döwletara dialogyň mundan beýläk-de ilerlediljekdigine ynam bildirdiler. 

Geçirilen söhbetdeşlikde döwlet Baştutanlarynyň derejesindäki syýasy gatnaşyklaryň, daşary syýasat edaralarynyň arasyndaky geňeşmeleriň we özara saparlaryň ähmiýetine aýratyn üns berildi. 

Söhbetdeşler özara gyzyklanma bildirilýän ugurlar, şol sanda halkara guramalaryň çäklerindäki gatnaşyklar boýunça özara pikir alyşdylar. 

Türkmenistanyň we Azerbaýjanyň arasynda diplomatik gatnaşyklar 1992-nji ýylyň 9-njy iýunynda ýola goýuldy.