2025-nji ýylyň 13 – 15-nji maýynda Aşgabatda Howanyň üýtgemegi boýunça 7-nji Merkezi Aziýa maslahaty (CACCC-2025) geçiriler. Ol howanyň üýtgemegine durnuklylygy berkitmek, uýgunlaşmak we täsirlerini azaltmak meseleleri boýunça gepleşikler üçin möhüm sebitleýin çärä öwrüler diýip, Türkmenistanyň resmi metbugaty ýekşenbe güni habar berdi.

 Merkezi Aziýanyň Sebitleýin ekologiýa merkezi (CAREC) Bütindünýä banky, Merkezi Aziýada suw we energetika boýunça Maksatnamasy (CAWEP), “RESILAND CA+” Maksatnamasy we Germaniýanyň Halkara hyzmatdaşlyk boýunça jemgyýeti (GIZ) bilelikde çäräni guraýjylar bolup çykyş edýärler.

 Habarda bellenilişi ýaly, maslahata sebit ýurtlarynyň ählisinden hökümetleriň, halkara guramalaryň wekilleriniň we howa meseleleri boýunça bilermenleriniň gatnaşmagyna garaşylýar. Howa meselelerini çözmäge maliýe serişdelerini çekmek, sebit hyzmatdaşlygyny berkitmek we howa wehimlerine durnuklylygy ýokarlandyrmak ýaly meseleler maslahatyň esasy mazmunyny emele getirer.

 “Merkezi Aziýada sebit we milli hereketler arkaly howa meselelerini maliýeleşdirmek boýunça ählumumy maksatlara ýetmek” “CACCC-2025” maslahatynyň esasy mowzugy bolar. Howanyň gyzgynlygynyň ýokarlanmagy, çölleşme, buzluklaryň eremeginiň çaltlanmagy ýaly sebitiň ekologiýa we ykdysady durnuklylygyna uly täsir edýän möhüm meseleler maslahatyň gün tertibine giriziler.

 Özara ylalaşylan maksatnamalary işläp taýýarlamak, maliýe we syýasy goldawlary çekmek hem-de howa ýagdaýlaryna has durnukly geljege geçişde Merkezi Aziýa ýurtlaryna ýardam etmek üçin meýdançany döretmek maslahatyň esasy maksady bolup durýar.