Türkmenistanyň paýtagty Aşgabatda Beýik Watançylyk urşunda gazanylan Ýeňşiň 80 ýyllygy mynasybetli Hatyra seýilgähi açyldy. Russiýa Federasiýasynyň Türkmenistandaky ilçihanasynyň çäginde geçirilen hatyra çäresi faşizme garşy göreşen sowet halklarynyň gahrymançylygyna goýulýan çuňňur hormatyň nyşany boldy diýip, Türkmenistanyň resmi metbugaty sişenbe güni habar berdi.

Dabarany Russiýanyň Türkmenistandaky Adatdan daşary we Doly ygtyýarly ilçisi Iwan Wolynkin tarapyndan açyldy. Ol öz çkyşynda taryhy hakydany gorap saklamagyň we ony geljek nesillere ýetirmegiň möhümdigini belledi.

Dabara Russiýanyň ilçihanasynyň işgärleriniň, daşary döwletleriň Türkmenistandaky diplomatik wekilhanalarynyň wekilleriniň gatnaşmagy Ýeňiş hakydasynyň halkara ähmiýete eýedigini görkezdi.

Dabaranyň resmi bölegi tamamlanandan soňra ilçi beýleki diplomatik wekiller bilen birlikde Hakyda seýilgähine ugradylar. Bu ýerde şanly senäniň şanyna onlarça bag nahallaryny oturtmak çäresi geçirildi. Gatnaşyjylar wepat bolanlaryň hormatyna bir minut dymyşlyk yglan etdiler hem-de seýilgähiň etegine gül desselerini goýdular.

Habarda bellenilişi ýaly, Hakyda seýilgähini döretmek başlangyjy 2020-nji ýylda badalga alan iri halkara taslamanyň möhüm bölegidir. Onuň çäklerinde her ýylda tutuş dünýäde Beýik Watançylyk urşunyň gerçekleriniň hormatyna 27 million bag nahaly ekilýär. Häzirki wagtda bu taslamanyň çäklerinde eýýäm 130 million düýp bag nahaly oturdyldy.

Russiýanyň Aşgabatdaky ilçihanasynyň çäginde döredilen täze Hakyda seýilgähi sowet halklarynyň edermenligine we ählumumy parahatçylyk ýörelgelerine bagyşlanan ýene-de bir möhüm ähmiýetli ýerleriň birine öwrüldi.