Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Russiýa Federasiýasynyň Tatarystan Respublikasynda geçirilýän “Russiýa – Yslam dünýäsi: KazanForum” XVI halkara ykdysady forumyna gatnaşar. Bu barada Türkmenistanyň DIM-i anna güni habar berdi.

Türkmenistan bu çärä gatnaşmagy Russiýa Federasiýasy we Yslam ýurtlary bilen hyzmatdaşlygynyň möhüm bölegi hökmünde garaýar. Syýasy, ykdysady, söwda, medeni-ynsanperwer ulgamlarda hyzmatdaşlygyň uzakmöhletleýin esasda berkidilmegine möhüm ähmiýet berilýär.

Her ýyl onlarça ýurtdan gatnaşyjylary bir ýere jemleýän “KazanForumda” Türkmenistana däp boýunça uly wekiliýet topary wekilçilik edýär. Halal senagatyna bagyşlanan “Russia Halal Expo 2025” halkara sergisinde Türkmenistanyň milli pawilýonynyň ýaýbaňlandyrylmagy nobatdaky gezek möhüm wakalaryň biri bolar. Onda azyk senagatyndan başlap dokma we senagat önümçiligine çenli dürli ugurlarda önüm öndürýän öňdebaryjy türkmen kärhanalary özleriniň harytlaryny bu ýere gelýänlere hödürleýärler.

Türkmenistanda öndürilýän önümleriň ýokary halkara ölçeglere laýyk gelýändigini bu harytlaryň Russiýa edilýän eksportynyň yzygiderli artmagynda hem görünýär. Kazanda geçirilýän sergä gatnaşmaklyk Russiýanyň sebitleri, şol sanda Yslam ýurtlary bilen işewürlik gatnaşyklary giňeltmek üçin goşmaça mümkinçilikleri açýar.