Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow anna güni Kazan Kremlinde Tatarystan Respublikasynyň Baştutany Rustam Minnihanow bilen duşuşdy. Bu barada Tatarystan Respublikasynyň Baştutanynyň metbugat gullugynyň başlygy Liliýa Galimowa özüniň Telegram kanalynda habar berdi.

Rustam Minnihanow türkmen halkynyň Milli Lideriniň arzyly we hormatly myhman hökmünde Kazanda bolýandygyna şatdygyny nygtady. Şeýle hem Tatarystan bilen Türkmenistanyň arasyndaky gatnaşyklaryň diňe bir hyzmatdaşlyga däl, eýsem dostluga hem esaslanýandygy bellenildi.

“Hyzmatdaşlyga berýän ünsüňiz üçin hoşallyk bildirýärin. Türkmenistan biziň üçin diňe bir hyzmatdaş däl-de, eýsem, arzyly dostdur” diýip, Tatarystanyň Baştutany aýtdy.

Gurbanguly Berdimuhamedow “Russiýa – Yslam dünýäsi: KazanForum” halkara ykdysady forumyna gatnaşmak üçin Kazan şäherinde saparda boldy. Türkmen halkynyň Milli Lideri forumdaky çykyşynda Beýik Ýüpek ýolunyň häzirki zaman görnüşi boljak Yslam ýurtlarynyň arasynda bitewi energetika, ulag we tehnologiýa guşagyny döretmegi teklip etdi. Bellenilişi ýaly, şeýle ulgam Ýewraziýada möhüm köpri, sebitiň ykdysady ösüşi üçin itergi beriji güýç bolup hyzmat eder.