Halkara söwda merkezi (HSM) 13-14-nji maýda Türkmenistanda elektron söwdany ösdürmäge we ýurduň Bütindünýä Söwda Guramasyna goşulmagyna taýýarlygyny ýokarlandyrmaga gönükdirilen okuw maslahatyny geçirdi. HSM-niň tehniki goldawlarynyň bir bölegi bolan çäre Türkmenistanyň ählumumy sanly ykdysadyýete goşulyşmagynyň ýolunda möhüm tapgyr boldy diýip, Türkmenistanyň resmi metbugaty habar berýär.

Okuw maslahaty açyk dialog görnüşinde döwlet edaralarynyň, işewür toparlarynyň wekilleriniň we halkara bilermenleriň gatnaşmagynda geçirildi. Pikir alyşmalarda söwda amallaryny sanlylaşdyrmak meselelerine, elektron täjirçiligiň gurallaryna we daşarky bazarlara çykmak üçin zerur bolan halkara ülňülere möhüm ähmiýet berildi.

Elektron söwdany ösdürmäge we Türkmenistanyň BSG-ä goşulmagyna taýýarlygyny ýokarlandyrmaga gönükdirilen okuw maslahaty, 2025-nji ýylyň 13-14-nji maýy, Aşgabat, Türkmenistan (Surat: THP)

Bu ugurdaky degişli taslama Ýewropa Bileleşiginiň maliýe taýdan ýardam bermeginde HSM tarapyndan durmuşa geçirilýär. “Türkmenistan: söwdanyň we goşulyşmagyň durnuklylygy” atly dört ýyllyk maksatnama işewürlik gurşawyny gowulandyrmagy, ýurduň eksport kuwwatlyklaryny berkitmegi we Türkmenistan bilen ÝB-niň arasynda söwda gatnaşyklary ösdürmegi maksat edinýär.

Başlangyjyň maksady Türkmenistanyň ykdysady ösüşini goldamakdan, bäsdeşlige ukyplylygy ýokarlandyrmak we döwrebap sanly çözgütleri ornaşdyrmak arkaly ýurduň sebit hem-de ählumumy söwda gatnaşyklaryna gatnaşygyny giňeltmekden ybaratdyr.