Türkmenistan türkmen-eýran serhediniň aýry-aýry böleklerinde söwda-ykdysady zolaklary döretmegi teklip etdi. Bu başlangyç 19-20-nji maýda Tähran şäherinde geçirilen Ykdysady hyzmatdaşlyk boýunça hökümetara türkmen-eýran toparynyň 18-nji mejlisinde öňe sürüldi diýip, Türkmenistanyň daşary syýasat edarasy habar berýär.

Türkmenistanyň DIM-iniň ýolbaşçysy Raşid Meredowyň we Eýranyň ýol we şähergurluşyk ministri Farzane Sadeg Malwajerdiň başlyklyk etmeginde geçirilen duşuşyk ikitaraplaýyn gatnaşyklaryň giň ugurlardaky meselelerini maslahatlaşmak üçin möhüm meýdança boldy.

Söwda-ykdysady gatnaşyklary ösdürmäge hem-de ulag, logistika, gaz we senagat önümçiligi, oba hem-de suw hojalygy, standartlaşdyrmak we maýa goýumlar ulgamlaryndaky hyzmatdaşlyga aýratyn üns berildi.

Mejlise gatnaşyjylar gepleşikleri yzygiderli geçirmegiň möhüm ähmiýetini nygtap, gazanylan ylalaşyklaryň ikitaraplaýyn gatnaşyklary ösdürmek üçin goşmaça itergi boljakdygyny beýan etdiler. Duşuşygyň jemleri boýunça toparyň 18-nji mejlisiniň Teswirnamasyna gol çekildi.

Saparynyň dowamynda türkmen wekiliýeti Eýranyň energetika ministri Abbas Aliabadi we nebit ministri Mohsen Pahnežad bilen aýry-aýry gepleşikleri geçirdi. Olarda ýangyç-energetika toplumynda hyzmatdaşlygy çuňlaşdyrmagyň geljegi ara alnyp maslahatlaşyldy.