Türkmenistanyň daşary işler ministri Raşid Meredow we Hytaýyň Kommunistik partiýasynyň Syýasy býurosynyň agzasy, DIM-iniň ýolbaşçysy Wan I duşenbe güni ikitaraplaýyn hyzmatdaşlygyň giň ulgamlardaky meselelerini telefon arkaly söhbetdeşlikde ara alyp maslahatlaşdylar. Onda syýasy-diplomatik, ykdysady we energtika ulgamlarda strategik hyzmatdaşlygy pugtalandyrmaga aýratyn üns berildi diýip, Türkmenistanyň DIM-i habar berýär.

Söhbetdeşler halkara giňişlikde, şol sanda BMG-niň çäklerinde birek-biregi köp ýyllaryň dowamynda goldamagyň ikitaraplaýyn gatnaşyklaryň möhüm bölegi bolmagynda galýandygyny bellediler. Ähli esasy ugurlar boýunça hyzmatdaşlygy giňeltmekde ygtybarly binýat bolup hyzmat edýän ýokary derejedäki ynanyşmak dialogynyň ähmiýeti aýratyn nygtaldy.

Taraplar daşary syýasat edaralarynyň arasynda yzygiderli gepleşikleri, şol sanda syýasy geňeşmeleri geçirmegi dowam etmek barada ylalaşdylar.

2025-nji ýylyň 15-nji ýanwarynda Türkmenistanyň daşary işler ministri Raşid Meredowyň Hytaý Halk Respublikasynyň daşary işler ministriniň kömekçisi Lýu Bin bilen duşuşygy geçirildi.