Şu ýyl Türkmenistandan 2844 zyýaratçy yslam dünýäsiniň mukaddes ýerleri bolan Mekke we Medine şäherlerinde haj parzlaryny berjaý etmekleri üçin Saud Arabystanyna zyýarata ugradylýar. Türkmenistanyň müftüsiniň müdiriýetiniň maglumatlaryna görä, 289 adam döwlet serişdeleriniň, galan 2555 adam hem öz serişdeleriniň hasabyna haj zyýaratlaryny amala aşyrarlar diýlip, “Türkmenistan” gazetiniň çarşenbe günündäki sanynda habar berilýär. 

Zyýaratçylar 8 topara bölünip tassyklanan tertipnama boýunça Saud Arabystanyna ugradylýar. Zyýaratlarynyň dowamynda olar yslam dünýäsiniň mukaddes ýerleri bolan Al-Haram metjidine, Zem-zem çeşmesine zyýarat edip, mukaddes Käbäniň daşyndan aýlanarlar. Medine şäherinde bolmaklygyň çäklerinde olar şeýle hem Muhammet pygamberiň metjidine we beýleki dini ýerlere baryp görerler.

Haj zyýaratyna Türkmenistanyň sebitleriniň ählisinden we Aşgabat şäherinden ýaşaýjylar gatnaşýarlar. Gurban baýramynyň bellenilýän mukaddes günlerinde türkmenistanly zyýaratçylar dünýäniň ähli ýerinden gelen millionlarça musulmanlara goşulyp, Watanyň abadançylygy, türkmen halkynyň agzybirligi we ýurt ýolbaşçylarynyň janlarynyň sag bolmagy üçin dileg-dogalar ederler. 

Haj zyýaratyna gatnaşyjylar din parzynyň ýerine ýetirilmegi üçin döredilýän şertler üçin hoşallyklaryny beýan edýärler. Zyýaratçylary äkidip getirmek üçin ýörite uçar gatnawlary guralýar. Zyýarat wagtynda oňa gatnaşyjylaryň ýanynda lukmançylyk işgärleri bolarlar. Umuman zyýarat möwsüminiň şowly tamamlanmagy üçin ähli zerur şertler döredildi. 

Haj möwsümi her ýyl Türkmenistandan müňlerçe zyýaratçyny bir ýere jemleýär. Munuň özi milli däp-dessurlaryň üstünlikli dowam etdirilýändigini, dini yrym-ynançlaryň berjaý edilmegine aýratyn üns berilýändigini görkezýär. Zyýaratçylaryň aýtmagyna görä, mukaddes sapara gatnaşmak üçin döredilýän mümkinçilikler milli däpleri hem-de ynsanperwer gymmatlyklary berkitmek babatda döwlet syýasatynyň üstünlikli durmuşa geçirilmeginiň netijesinde mümkin boldy.