2025-nji ýylyň 11 – 13-nji iýunynda Türkmenistanyň Söwda-senagat edarasynda (TSSE) “Turkmen Textile Expo 2025” atly halkara sergi-ýarmarkasy geçiriler. Onda türkmen dokma pudagynyň soňky gazananlary hem-de halkara hyzmatdaşlykda ýetilen sepgitler tanyşdyrylar diýip, TSSE-niň metbugat gullugy habar berýär.

Sergide dokma senagatynyň tebigy çig maly gaýtadan işlemek, lybas we aýakgap önümçiligi, öý-hojalykda ulanylýan dokma önümler, ätiýaçlyk şaýlary, himiki serişdeler, boýaglar hem-de bezeg harytlary ýaly dürli ugurlary görkeziler. Sergä gatnaşyjylar dokma senagatynyň geljegini emele getirýän öňdebaryjy tehnologiýalary we innowasiýalary görkezerler.

“Turkmen Textile Expo 2025” halkara sergisi diňe bir Türkmenistanyň dokma pudagynyň mümkinçiliklerini açmak bilen çäklenmän, eýsem, bu ulgamda halkara hyzmatdaşlygyny berkitmekde möhüm işewürlik meýdançasyna öwrüler. Bu çäre gatnaşyjylara innowasion çözgütleri öwrenmek we hünär tejribelerini alyşmak üçin giň mümkinçilikleri döreder.

“Turkmen Textile Expo 2025” sergisiniň dünýäniň dürli künjeginden kompaniýalaryň, önüm öndürijileriň we hünärmenleriň gatnaşmagynda ýokary guramaçylyk derejesinde geçirmek göz öňünde tutulýar.