2025-nji ýylyň 30-njy maýynda Almaty Tehnologiýa uniwersitetinde (ATU) Türkmenistanyň hemişelik Bitaraplygynyň 30 ýyllygy we BMG-niň Baş Assambleýasy tarapyndan 2025-nji ýylyň “Halkara parahatçylyk we ynanyşmak ýyly” diýlip yglan edilmegi mynasybetli Türkmenistanyň Ilçihanasynyň gatnaşmagynda çäre guraldy.

Çäräniň dabaraly bölüminde Almaty Tehnologiýa Uniwersitetiniň ýolbaşçylary, hormatly myhmanlar we türkmen talyplary gutlag sözleri bilen çykyş etdiler.

Türkmenistanyň Gazagystan Respublikasyndaky Ilçihanasynyň wekili öz çykyşynda 2025-nji ýylyň başyndan bäri Türkmenistanda Halkara parahatçylyk we ynanyşmak ýylyna bagyşlanan köpsanly çäreleriň geçirilýändigini belledi.

Çärä gatnaşyjylara Türkmenistanyň soňky ýyllarda gazananlaryny we ýeten sepgitlerini, şol sanda ýurdumyzyň Bitaraplygynyň 30 ýyllygyny şöhlelendirýän ýörite wideoýazgy görkezildi.

Baýramçylykda türkmen we gazak talyplary folklor sahna çykyşlaryny – “Küşdepdi” milli tansyny we “Bilezik” aýdymyny ýerine ýetirdiler, şeýle hem milli gurallarda halk sazlaryny çaldylar.

Türkmenistanyň Ilçihanasynyň wekilleri uniwersitetiň ýolbaşçylary bilen duşuşyk geçirip, talyplaryň durmuşy bilen baglanyşykly möhüm meseleleri ara alyp maslahatlaşdylar.