Türkmenistanyň Ministrler Kabinetiniň ýanyndaky Ulag we kommunikasiýalar agentliginiň Baş direktory Mämmethan Çakyýew anna güni sanly ulgam arkaly geçirilen Ministrler Kabinetiniň mejlisinde “Sanly çözgüt — 2025” atly innowasion taslamalaryň bäsleşigini geçirmek boýunça alnyp barylýan işler barada Türkmenistanyň Prezidenti Serdar Berdimuhamedowa hasabat berdi. Bu barada Türkmenistanyň resmi metbugaty habar berdi.

Ýurtda zehinli ýaşlary ýüze çykarmak maksady bilen guralýan bu bäsleşigi emeli aň, robototehnika we awtomatizasiýa, “akylly” oba hojalyk tehnologiýalary, “akylly” şäher, bilim we elektron okuw, sanly lukmançylyk hem-de hyzmatlar ulgamy ýaly ugurlar boýunça geçirmek meýilleşdirilýär.

Türkmenistanyň Prezidenti hasabaty diňläp, ýurt boýunça sanly ykdysadyýeti ösdürmekde maksatnamalaýyn işleriň durmuşa geçirilýändigini aýdyp, her ýyl geçirilýän innowasion taslamalaryň bäsleşigine programma üpjünçiligini işläp düzýän we innowasion oýlap tapyşlar bilen meşgullanýan ýaşlaryň giňden gatnaşmagynyň bu ugurdaky özgertmeleriň rowaçlanýandygyny görkezýändigini belledi.

Türkmenistanyň döwlet Baştutany “Sanly çözgüt — 2025” atly innowasion taslamalaryň bäsleşigini yglan etmek baradaky teklibi goldap, agentligiň ýolbaşçysyna bu ugurda degişli işleri geçirmegi tabşyrdy.

Şeýle hem Türkmenistanyň Ministrler Kabinetiniň mejlisinde wise-premýer Nökerguly Atagulyýew Türkiýede Türkmenistanyň eksport harytlarynyň sergisini geçirmäge görülýän taýýarlyk işleri barada hasabat berdi.