Türkmenistanyň paýtagty Aşgabat şäherinde 2025-nji ýylyň 21-23-nji awgust aralygynda “Kids Ekspo: ähli zat çagalar üçin” halkara sergi-ýarmarkasy geçiriler. Bu waka çagalaryň önümleri we hyzmatlary pudagynda möhüm pursat bolup, işewürler üçin bu bazar segmentiniň ösmegine goşant goşmak üçin ajaýyp mümkinçilik döreder. Bu barada Türkmenistanyň Söwda-senagat edarasy habar berdi.

Sergi-ýarmarkanyň dowamynda oňa gatnaşyjylar çagalar üçin niýetlenen dürli harytlary we çözgütleri — gündelik sarp edilýän önümlerden başlap, bilim we dynç alyş hyzmatlaryna çenli giň görnüşli harytlary hödürlärler.

Habarda bellenilişi ýaly, “Kids Expo” diňe bir çagalar hyzmatlary ulgamynda innowasiýalary öňe sürmek bilen çäklenmän, eýsem halkara maýadarlaryň türkmen bazaryna bolan gyzyklanmasyny hem ýokarlandyrar.

Bu sergi sebitde öz işini giňeltmek we täze hyzmatdaşlygy ýola goýmak isleýän kompaniýalar üçin özüne çekiji merkez bolar.

“Kids Ekspo: ähli zat çagalar üçin” atly ilkinji halkara sergi-ýarmarka 2024-nji ýylyň 19-22-nji awgusty aralygynda Aşgabatda geçirilipdi.