Hytaý Halk Respublikasynyň Başlygy Si Szinpin sişenbe güni Gazagystanyň paýtagty Astanada geçirilen “Merkezi Aziýa – Hytaý” ikinji sammitiniň çäginde geçirilen ikitaraplaýyn gepleşikleriň dowamynda Türkmenistanyň Prezidenti Serdar Berdimuhamedowy Şanhaý Hyzmatdaşlyk Guramasynyň (ŞHG) öňümizdäki sammitine, şeýle hem Hytaýda geçiriljek beýleki halkara çärelere gatnaşmaga çagyrdy.

Türkmenistanyň Prezidenti Serdar Berdimuhamedow öz gezeginde kärdeşi Si Szinpini özüne amatly wagtda Türkmenistana resmi sapar bilen gelmäge çagyrdy. Bu barada Türkmenistanyň resmi metbugaty habar berdi.

Duşuşyk Gazagystanyň paýtagtynda ýerleşýän “St. Regis” myhmanhanasynda geçirildi. Taraplar türkmen-hytaý gatnaşyklarynyň strategiki häsiýetini ara alyp maslahatlaşdylar.

Gepleşikleriň netijesi boýunça Türkmenistan bilen Hytaýyň arasynda tehniki we ykdysady hyzmatdaşlyk baradaky hökümetara Ylalaşyga gol çekildi.

Taraplar ikitaraplaýyn hyzmatdaşlygyň häzirki ýagdaýyny we geljekki mümkinçiliklerini, şeýle hem özara gyzyklanma döredýän sebit we halkara meselelerini ara alyp maslahatlaşdylar. Iki ýurduň döwlet Baştutanlary ýurtlaryň arasynda syýasat, söwda, medeniýet we ynsanperwer hyzmatdaşlyk ýaly ugurlarda strategik hyzmatdaşlyk derejesine ýetilendigini bellediler.

Türkmenistanyň Prezidenti Serdar Berdimuhamedow Gazagystanyň paýtagty Astana şäherinde geçirilen “Merkezi Aziýa – Hytaý” formatyndaky ikinji sammite gatnaşdy.