Türkmenistanyň daşary işler ministriniň orunbasary Ahmet Gurbanow 2025-nji ýylyň 24-nji iýunynda Beýik Britaniýanyň Ýewropa, Demirgazyk Amerika we daşary ýurt territoriýalary boýunça döwlet ministri Stiwen Dauti bilen telefon arkaly söhbetdeşlik geçirdi. Bu barada Türkmenistanyň Daşary işler ministrligi habar berýär.

Söhbetdeşligiň dowamynda britan tarapy Eýrandan Beýik Britaniýanyň raýatlarynyň çykmagyna döredilen mümkinçilik üçin Türkmenistanyň ýolbaşçylaryna minnetdarlyk bildirdi. Bu Türkmenistanyň Bütindünýä Bitaraplyk derejesine we Ýakyn Gündogarda bolup geçýän wakalara ynsanperwer çemeleşmegine esaslanyp amala aşyryldy.

Taraplar ikitaraplaýyn hyzmatdaşlygyň häzirki ýagdaýyny we geljekki mümkinçiliklerini, şol sanda söwda-ykdysady we syýasy-diplomatik ugurlardaky hyzmatdaşlygy ara alyp maslahatlaşdylar. 2025-nji ýylyň mart aýynda Aşgabatda geçirilen “Türkmenistanyň geljegine maýa goýumlar” atly halkara maýa goýum forumyna britan kompaniýalarynyň gatnaşmagynyň oňyn bahalandyrylandygy bellenildi.

Şeýle hem söhbetdeşligiň çäklerinde sebit meseleleri we 2025-nji ýylyň ikinji ýarymy üçin meýilleşdirilen ikitaraplaýyn hem-de köptaraplaýyn çäreler ara alnyp maslahatlaşyldy. Iki ýurduň daşary syýasat edaralarynyň arasynda yzygiderli dialogy saklamagyň möhümdigi nygtaldy.

Söhbetdeşligiň ahyrynda britan tarapy Türkmenistana ynsanperwer goldawy üçin ýene-de bir gezek minnetdarlyk bildirdi.