Türkmenistan bilen Aziýa ösüş banky (AÖB) 24-nji iýunda Aşgabatda Lukmançylyk orta okuw mekdebini gurmak taslamasyna karz serişdelerini bermek baradaky ylalaşyk Teswirnamasyna gol çekdiler. Gol çekmek dabarasy Türkmenistanyň DIM-iň binasynda Türkmenistan bilen Aziýa ösüş bankynyň arasyndaky hyzmatdaşlygynyň 25 ýyllygyna bagyşlanan tegelek stol maslahatynyň dowamynda geçirildi. Bu barada Türkmenistanyň DIM-i sişenbe güni habar berdi.

Tegelek stol maslahatyna Türkmenistanyň Ministrler Kabinetiniň Başlygynyň orunbasarlary, degişli ministrlikleriň we pudak edaralarynyň, bank düzümleriniň ýolbaşçylary, Aziýa ösüş bankynyň (AÖB) Günorta, Merkezi we Günbatar Aziýa boýunça wise-prezidenti Ýan Inmini ýolbaşçylygyndaky wekiliýet, şeýle hem ykdysadyýet we ösüş ulgamynyň bilermenleri gatnaşdylar.

Çäräniň açylyş dabarasynda Türkmenistanyň Ministrler Kabinetiniň Başlygynyň orunbasary Hojamyrat Geldimyradow Türkmenistan bilen AÖB-nyň arasyndaky 25 ýyllyk hyzmatdaşlygyň netijeli häsiýetini belläp, onuň ýurduň ösüşine we ykdysadyýetiniň güýçlenmegine möhüm goşant goşandygyny aýtdy. 

Aziýa ösüş bankynyň Günorta, Merkezi we Günbatar Aziýa boýunça wise-prezidenti Ýan Inmin öz çykyşynda AÖB bilen Türkmenistanyň arasyndaky köpýyllyk hyzmatdaşlygyň birek-birege ynanyşmak we hormat goýmak ýörelgelerine  esaslanýandygyny aýtdy. Şeýle hem, Aşgabatda Türkmenistanyň Prezidenti Serdar Berdimuhamedow bilen ýakynda bolan duşuşygyň ähmiýetini aýratyn belledi.

Hususan-da, Arkadag akylly şäherinde durmuşa geçirilmegi meýilleşdirilýän taslamalaryň ähmiýeti barada gürrüň edildi. Maý aýynda AÖB bilen Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň arasynda gol çekilen Özara düşünişmek hakyndaky Ähtnamanyň ähmiýeti aýratyn bellenildi.

Şeýle-de, maslahata gatnaşyjylar Türkmenistan bilen AÖB-niň arasyndaky hyzmatdaşlygyň geljegini, şol sanda infrastruktura taslamalaryny maliýeleşdirmek, hususy pudagy goldamak, adam maliýesini ösdürmek we durnukly ösüş ýaly ugurlary ara alyp maslahatlaşdylar. Türkmenistanyň energiýa pudagyny diwersifikasiýalaşdyrmaga, demir ýol ulaglaryny döwrebaplaşdyrmaga we AÖB-niň maliýe we karz hyzmatlarynyň goldawy bilen kiçi we orta kärhanalary ösdürmäge aýratyn üns berildi.

Tegelek stol maslahaty AÖB bilen Türkmenistanyň 25 ýyllyk hyzmatdaşlygynyň jemlerini jemlemäge we 2024–2028-nji ýyllar üçin Hyzmatdaşlyk strategiýasynyň çäginde strategik ugurlary kesgitlemäge mümkinçilik döretdi.