Daşary ýurtlar bilen özara gatnaşyklarynda hemişelik bitaraplyk derejesine daýanýan Türkmenistan, halkara prosesleriniň paýhasly we oýlanyşykly gatnaşyjysy hökmünde Russiýada hormat we ykrar gazandy. Bu barada Russiýanyň daşary işler ministri Sergeý Lawrow 25-nji iýunda Aşgabatda Türkmenistanyň Daşary işler ministrliginiň Halkara gatnaşyklary institutyň diplomatlarynyň, mugallymlarynyň we talyplarynyň öňünde eden çykyşynda aýtdy.

Türkmenistanyň DIM-niň habar bermegine görä, Russiýanyň daşary syýasat edarasynyň ýolbaşçysynyň çykyşy “Ýyldyz” myhmanhanasynda gurnaldy. Sergeý Lawrow häzirki zaman dünýä ýagdaýlary barada öz garaýyşlaryny paýlaşyp, türkmen-rus hyzmatdaşlygynyň dürli ugurlar boýunça tiz we netijeli ösýändigini nygtady.

Ministr Türkmenistanyň halkara syýasatyndaky ornuna ýokary baha berip, ýurduň BMG-niň Baş Assambleýasy tarapyndan üç gezek bir agyzdan bitaraplyk derejesi ykrar edilen ýeke-täk döwletdigini aýtdy. Şeýle hem ol 2025-nji ýylyň “Halkara parahatçylyk we ynanyşmak” ýyly diýlip yglan edilmegi hem-de Merkezi Aziýada parahatçylyk, ynam we hyzmatdaşlyk zolagyny döretmek başlangyjy ýaly teklipleriň öňe sürülmeginde Aşgabadyň goşandyny belledi.

TASS agentliginiň habar bermegine görä, Sergeý Lawrow Türkmenistan özüniň bitaraplyk derejesine esaslanyp, dürli gepleşikler üçin meýdança bolup biljekdigini aýtdy.

Çykyşynyň ahyrynda Russiýanyň daşary işler ministri Eýrandaky dartgynly ýagdaý bilen baglylykda rus raýatlarynyň tiz çykarylmagy üçin zerur kömek we guramaçylyk işleri üçin Türkmenistanyň ýolbaşçylaryna minnetdarlyk bildirdi.