Türkmenistanyň Gruziýadaky ilçisi Döwletmyrat Seýitmämmedow çarşenbe güni Şota Rustaweli adyndaky Milli teatryň direktory Georgiý Tewzadze bilen duşuşdy we iki ýurduň arasyndaky medeni hyzmatdaşlygyň mümkinçiliklerini ara alyp maslahatlaşdy. Bu barada Türkmenistanyň Gruziýadaky ilçihanasy habar berdi.

Duşuşygyň dowamynda taraplar teatr sungatynyň özüňi beýan etmegiň gadymy görnüşleriniň biri hökmünde hem-de halklaryň medeni we taryhy özboluşlylygynyň möhüm bölegi hökmünde ähmiýetini belläp geçdiler. Olar teatryň medeni mirasy saklamaga we özara düşünişmegi berkitmäge möhüm goşant goşýandygyny nygtadylar.

Türkmenistanyň Gruziýadaky ilçisi D. Seýitmämmedowyň Şota Rustaweli adyndaky Milli teatryň direktory G. Tewzadze bilen duşuşygy, 2025-nji ýylyň 26-njy iýuny (Surat: Türkmenistanyň Gruziýadaky ilçihanasy)

Ilçi Döwletmyrat Seýitmämmedow Bitaraplygyň 30 ýyllygyna we Halkara parahatçylyk we ynanyşmak ýyly mynasybetli geçiriljek medeni çäreler barada gürrüň berdi. Şunuň bilen baglylykda, taraplar bilelikdäki medeni başlangyçlary geçirmegi ylalaşdylar.

Duşuşygyň ahyrynda gatnaşyjylar Türkmenistanyň we Gruziýanyň teatrlarynyň arasynda gönüden-göni döredijilik gatnaşyklarynyň ýola goýulmagynyň medeni alyş-çalyşyklaryň ösmegine we iki ýurduň halklarynyň ýakynlaşmagyna ýardam berjekdigine ynam bildirdiler.

Saparyň çäklerinde Georgiý Tewzadze ilçä teatryň taryhy, häzirki taslamalary we döredijilik başlangyçlary barada gürrüň berip, teatr boýunça gezelenç gurady.