Arkadag şäheriniň gurluşygynyň ikinji tapgyrynda 180-den gowrak ýaşaýyş jaýy bina edilýär. Bu barada şenbe güni çap edilen “Türkmenistan” gazetinde habar berilýär.

Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň berýän maglumatlaryna görä, her biri 30 öýli, 5 gatly ýaşaýyş jaýlarynyň 36-sy, 40 öýli, 5 gatly ýaşaýyş jaýlarynyň 36-sy, 42 öýli, 7 gatly ýaşaýyş jaýlarynyň 24-si, şeýle-de 54 öýli, 9 gatly ýaşaýyş jaýlarynyň 14-si gurulýar.

Şeýle hem bu ýerde 72 sany iki öýli, iki gatly täze kottejler bina edilýär. Bu binalara “akylly” öý tehnologiýalary ornaşdyrylýar. Ýaşaýjylaryň ähli durmuş zerurlyklary göz öňünde tutulyp, bilim-terbiýeçilik, söwda, hyzmat we beýleki maksatly desgalar ýaşaýyş toplumlaryna ýakyn aralykda ýerleşdirilýär.

Habarda bellenilişi ýaly,  “Akylly” şäheriň gurluşygynyň ikinji tapgyrynda her biri 720 orunlyk umumybilim berýän mekdepleriň 5-si, 320 orunlyk çagalar baglarynyň 9-sy, saglyk öýi, ýangyna garşy göreş gullugynyň, Arkadag şäheriniň Gorjaw etrap häkimliginiň edara binalary, awtomenzil, demir ýol menzili, Çeper halyçylyk kärhanasy, Türkmen halysynyň we el işleriniň milli muzeýi, seýilgähler, söwda we hyzmat ediş toplumy bina ediler.

Arkadag şäheri 2023-nji ýylyň 29-njy iýunynda dabaraly açyldy we onuň gurluşygynyň birinji tapgyrynda jemi 336 sany döwrebap desga guruldy.