Türkmenistanyň Prezidenti Serdar Berdimuhamedow ýurduň taryhynda ýeke-täk “akylly” şäher bolan Arkadag şäheriniň açylmagynyň iki ýyllygy bilen onuň ýaşaýjylaryny tüýs ýürekden gutlady. Bu barada Türkmenistanyň resmi metbugaty ýekşenbe güni habar berdi.

Türkmenistanyň döwlet Baştutany Köpetdagyň gözel künjeginde kemala gelen bu şäheriň ýurduň gazanýan üstünlikleriniň, ägirt uly ykdysady kuwwatynyň aýdyň nyşanyna öwrülendigini aýdyp, ýaşamak, işlemek we dynç almak üçin iň amatly, kämil şäherleriň biri bolan Arkadag şäheriniň iki ýyllygy mynasybetli guralýan dabaralaryň agzybirligi we jebisligi has-da berkitmekde, türkmen halkyny täze sepgitlere ýetmäge ruhlandyrmakda uly ähmiýetiniň boljakdygyna berk ynanýandygyny nygtady.

““Akylly” şäher konsepsiýasy esasynda gurlan edara we durmuş maksatly desgalar, örän oňaýly ýaşaýyş jaýlary, ministrlikleriň, pudaklaýyn dolandyryş edaralarynyň, banklaryň şahamçalary we başga-da köp sanly möhüm binalar ýaşaýjylaryň hyzmatyna berildi. Şäher giň şaýollar, döwrebap yşyklandyryş, dolandyryş ulgamlary bilen üpjün edildi. Şäheriň ilatyna we myhmanlaryna häzirki zaman ulaglary ýokary derejede hyzmat edýär” diýip, Türkmenistanyň Prezidentiniň gutlag hatynda bellenilýär.

Şeýle hem türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow  Arkadag şäheriniň açylmagynyň iki ýyllygy mynasybetli şäheriň ýaşaýjylaryny gutlady.

2023-nji ýylyň 29-njy iýunynda esaslandyrylan Arkadag şäheri ýurduň ilkinji “akylly” şäheri hökmünde tanalyp, şähergurluşyk, ekologiýa we sanly tehnologiýalar babatynda innowasion çözgütleri üçin halkara derejesinde ykrar edildi. Gazanan üstünlikleri üçin Arkadag şäheri birnäçe abraýly halkara baýraklaryna mynasyp boldy.