Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow şenbe güni ýurda sapar bilen gelen “Kawasaki Heavy Industries Ltd.” kompaniýasynyň ýerine ýetiriji direktory Kenji Sanada bilen duşuşdy. Bu barada Türkmenistanyň resmi metbugaty habar berdi.

Duşuşygyň dowamynda bellenilişi ýaly, Türkmenistan Aziýa-Ýuwaş ummany sebitiniň ýurtlary bilen oňyn gatnaşyklary ösdürmegi daşary ykdysady syýasatynyň strategik ugry hökmünde kesgitleýär. Şunda Türkmenistan ozaldan gelýän ygtybarly hyzmatdaş hasaplanýan Ýaponiýa bilen netijeli gatnaşyklary pugtalandyrmaga uly ähmiýet berýär.

Söhbetdeşligiň barşynda türkmen halkynyň Milli Lideri we işewür geljekki täze taslamalar barada pikir alyşdylar.

Gurbanguly Berdimuhamedow ikitaraplaýyn hyzmatdaşlygy mundan beýläk-de ösdürmek üçin uly mümkinçilikleriň bardygyny belläp, ýurduň “Kawasaki” kompaniýasynyň innowasion taslamalar babatda tekliplerine seretmäge taýýardygyny aýtdy.

Kompaniýanyň ýolbaşçysy Türkmenistanda netijeli işlemäge döredilýän mümkinçilikler we şertler üçin Türkmenistanyň Halk Maslahatynyň Başlygyna hem-de Türkmenistanyň Prezidentine hoşallygyny beýan edip, ýolbaşçylyk edýän kompaniýasynyň hyzmatdaşlyk borçnamalaryna mundan beýläk-de ygrarly boljakdygyna ynandyrdy.

Şol gün Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow bilen “Daewoo Engineering & Construction Co., Ltd” koreý kompaniýasynyň müdiriýetiniň başlygy Jong Won-junyň arasynda hem duşuşyk geçirildi.