Aşgabatda ýerleşýän Türkmenistanyň döwlet gümrük gullugynyň okuw merkezi Bütindünýä gümrük guramasynyň (BGG) sebitleýin okuw merkeziniň derejesini aldy. Türkmenistan bilen Bütindünýä gümrük guramasynyň arasynda özara düşünişmek hakynda degişli Ähtnama 2025-nji ýylyň 26–28-nji iýunynda geçirilen guramanyň geňeşiniň 145–146-njy sessiýasynda gol çekildi. Bu barada Türkmenistanyň Döwlet gümrük gullugy habar berýär.

Bu resminama hünär taýýarlygy we gümrük işi babatda halkara bilim gatnaşyklaryny giňeltmek ugrundaky hyzmatdaşlygy göz öňünde tutýar.

Okuw merkezi Bütindünýä gümrük guramasynyň standartlaryna we okuw maksatnamalaryna laýyklykda iş alyp barar. Ol Türkmenistanyň Döwlet gümrük gullugynyň işgärlerini okatmak, gaýtadan taýýarlamak we hünär derejesini ýokarlandyrmak bilen bir hatarda, sebitdäki beýleki ýurtlaryň gümrük işgärlerine-de hyzmat eder.

Türkmenistan bilen Bütindünýä Gümrük Guramasynyň arasynda özara düşünişmek hakynda Ähtnama gol çekmek dabarasy, 2025-nji ýylyň 26–28-nji iýuny, Brýussel, Belgiýa.

Bu derejäniň berilmegi bilen halkara bilermenleriň gatnaşmagynda bilelikdäki seminarlary, okuw maslahatlaryny we ylmy-barlag taslamalaryny geçirmäge mümkinçilik döredýär. Bu ädim Türkmenistanyň dünýä gümrük jemgyýetçiligindäki işjeň ornuny güýçlendirýär we sebit derejesinde hünär okuw ulgamynyň emele gelmegine ýardam berýär.

Bütindünýä gümrük guramasynyň (BGG) 1952-nji ýylda esaslandyrylan halkara hökümetara gurama bolup, dünýäniň 180-den gowrak gümrük edaralaryny birleşdirýär.