Türkmen halkynyň Milli Lideri, Türkmenistan Halk Maslahatynyň Başlygy Gurbanguly Berdimuhamedow şenbe güni iş sapary bilen Arkadag şäherine bardy. Sapar wagtynda türkmen halkynyň Milli Lideri şäherdäki gurluşyk işleriniň alnyp barylyşy we onuň infrastrukturasynyň ösüşi bilen tanyşdy. Bu barada Türkmenistanyň resmi metbugaty habar berýär.

Saparyň dowamynda şäheriň ulag ulgamynyň döwrebaplaşdyrylmagyna aýratyn üns berildi. Gurbanguly Berdimuhammedow Gökdepe şaýolunyň ugrunda gurlan täze köpugurly awtoulag aýlawyny synlady, bu desganyň gurluşygynda diňe ýerli gurluşyk materiallary ulanyldy.

Gurbanguly Berdimuhammedow Gökdepe we Keýmir kör şaýollarynyň Arkadag şäherinde gurluşygy alnyp barylýan demir ýol we awtoulag menzillerini birleşdirjekdigini aýratyn nygtady.

Türkmen halkynyň Milli Lideri köpriniň açylyş dabarasyna hemmetaraplaýyn taýýarlyk görmek babatda degişli maslahatlaryny berip, soňra Keýmir kör şaýoly bilen Arkadag şäherine tarap ugrady. Ýol ugruna ýakyn meýdançalaryň, ýaşyl zolaklaryň we landşaft dizaýnlarynyň ýagdaýy bilen tanyşdy.

Şeýle-de, Türkmenistanyň Halk Maslahatynyň Başlygy Arkadag şäheriniň gurluşygynyň ikinji tapgyrynda göz öňünde tutulan jemgyýetçilik we senagat maksatly desgalaryň, Gökdepe şaýolundaky häzirki zaman awtoulag aýlawynyň dizaýn taslamalary bilen tanyşdy.

Saparyň çäginde Gurbanguly Berdimuhamedow Arkadag şäheriniň metjidiniň gurluşyk meýdançasyna baryp gördi.

Türkmen halkynyň Milli Lideri hemmelere alyp barýan jogapkärli işlerinde üstünlikleri arzuw edip, bu ýerden ugrady.