Türkmenistan bilen Azerbaýjan işewürlik gatnaşyklaryny giňeltmegiň, şol sanda iki döwletiň çäklerinde geçirilýän sergilere, forumlara we beýleki bilelikdäki çärelere işewürleriň gatnaşmagynyň möhümdigini belläp geçdiler. Bu mesele duşenbe güni Bakuda geçirilen ykdysady hyzmatdaşlyk boýunça hökümetara toparynyň 8-nji mejlisinde ara alnyp maslahatlaşyldy. Bu barada Türkmenistanyň resmi metbugaty habar berýär.

Mejlise Türkmenistanyň Ministrler Kabinetiniň Başlygynyň orunbasary Nökerguly Atagulyýewiň we Azerbaýjan Respublikasynyň ykdysadyýet ministri Mikail Jabbarowyň ýolbaşçylygyndaky wekiliýetler gatnaşdylar.

Gepleşikleriň dowamynda taraplar söwda-ykdysady, energetika, ulag we medeni-ynsanperwer ýaly möhüm ugurlary öz içine alýan hyzmatdaşlygyň ýagdaýyny we geljekki mümkinçiliklerini ara alyp maslahatlaşdylar. Hususan-da, energetika we nebit-gaz pudagynda hyzmatdaşlygy giňeltmek meselelerine aýratyn üns berildi.

Mejlisiň jemleri boýunça söwda-ykdysady we beýleki möhüm ugurlarda hyzmatdaşlygy mundan beýläk-de pugtalandyrmagy göz öňünde tutýan Teswirnama gol çekildi. Taraplar hökümetara toparynyň indiki 9-njy mejlisini Aşgabat şäherinde geçirmegi ylalaşdylar.