Türkmenistanyň BMG-niň Ženewadaky edarasynyň ýanyndaky Hemişelik wekili, Ilçi Wepa Hajiýew 2025-nji ýylyň 30-njy iýulynda Mawritaniýa Yslam Respublikasynyň wekiliýeti bilen duşuşyk geçirdi. Geçirilen gepleşikleriň dowamynda türkmen-mawritan hyzmatdaşlygynyň häzirki ýagdaýy hem-de onuň geljekki ösüş mümkinçilikleri, halkara guramalarynyň çäklerinde alnyp barylýan hyzmatdaşlyk ara alnyp maslahatlaşyldy.

Taraplar durnukly ösüş ugrunda hyzmatdaşlygy çuňlaşdyrmaga, şeýle-de ulag-logistika ulgamyndaky gatnaşyklary giňeltmäge özara gyzyklanma bildirýändiklerini nygtadylar. Şeýle hem sebit we sebitara gatnaşyklarynyň işjeňleşdirilmeginiň ähmiýeti aýratyn bellenildi. Bu barada Türkmenistanyň BMG-niň Ženewadaky edarasynyň ýanyndaky Hemişelik wekilhanasy habar berýär.

Söhbetdeşlikde 2025-nji ýylyň 5–8-nji awgusty aralygynda Awazada geçiriljek BMG-niň Deňze çykalgasy bolmadyk ösüp barýan ýurtlar boýunça üçünji maslahatyna (LLDC3) aýratyn üns berildi.

Mawritaniýa Yslam Respublikasy Afrikanyň günbatar böleginde ýerleşip, ol Marokko, Alžir, Mali we Senegal döwletleri bilen araçäkleşýär hem-de Atlantik ummanyna çykalgasy bardyr. Döwletiniň paýtagty – Nuakçott şäheridir. Ýurduň ykdysadyýeti tebigy baýlyklaryň çykarylmagyna, balykçylyk hem-de oba hojalyk önümçiligine daýanýar.