Türkmenistan we Owganystan Owganystanyň Hyrat welaýatynda ýerleşýän Turgundy gury ýer portunyň maýa goýum taslamasyny durmuşa geçirmek barada ylalaşyga we şertnama gol çekdiler. Ylalaşyga laýyklykda portuň infrastrukturasyny giňeltmek üçin başlangyç 5 million ABŞ dollary maýa goýmak göz öňünde tutulýar. Bu barada anna güni “TOLOnews” agentligi çarşenbe güni habar berdi.

Taslamanyň çäklerinde täze ammarlary gurmak hem-de portuň çäginde birnäçe söwda ýüklerini ýükleýiş-düşüriş desgalarynyň taslamasyny düzmek we gurmak meýilleşdirilýär. Owganystanyň Jemgyýetçilik işler ministrliginiň wekili Mohammad Aşraf Hakşenasyň aýtmagyna görä, bu infrastruktura Turgundy — Hyrat demirýol boýunça ýükleri daşamak üçin ulanylar.

Onuň bellemegine görä, maýa goýum serişdeleri doly Türkmenistan tarapyndan üpjün edilip, işleriň ýerine ýetirilişi Owganystanyň ýerli kanunçylygyna laýyklykda amala aşyrylar. Taslama tamamlanandan soň, Türkmenistanyň goýan maýa serişdeleri täze desgalardan alynjak girdejileriň hasabyna  doly gaýtarylyp berler.

Türkmenistan Owganystanyň esasy söwda-ykdysady hyzmatdaşlarynyň biri bolup durýar. Iki ýurduň arasynda elektrik energiýa, nebit we gaz üpjünçiligi ýaly ugurlarda hem-de Türkmenistan — Owganystan — Pakistan — Hindistan (TAPI) gaz geçirijisi, optiki süýümli aragatnaşyk we demirýol infrastrukturasyny ösdürmek ýaly iri sebitleýin taslamalarda hyzmatdaşlyk dowam edýär.

Turgundy portundaky taslamanyň durmuşa geçirilmegi iki ýurduň arasyndaky tranzit söwdasyny güýçlendirip, sebitleýin ykdysady hyzmatdaşlygyň giňelmegine uly goşant goşmagyna garaşylýar.