Türkmenistanyň Prezidenti Serdar Berdimuhamedow bilen Gazagystan Respublikasynyň Prezidenti Kasym-Žomart Tokaýew sişenbe güni  Awazada duşuşyk geçirdiler. Bu barada Gazagystan Respublikasynyň Prezidentiniň Metbugat gullugy habar berýär.

Duşuşygyň dowamynda Kasym-Žomart Tokaýew BMG-niň Deňze çykalgasy bolmadyk ösüp barýan döwletler boýunça Üçünji Konferensiýasyna (LLDC3) gatnaşmaga çakylyk üçin minnetdarlyk bildirdi.

Gazagystanyň Prezidenti bu forumyň deňze çykalgasy bolmadyk döwletleriň ýagdaýlary bilen bagly meseleleri ara alyp maslahatlaşmak, pikir alyşmak we anyk çözgütleri işläp taýýarlamak üçin möhüm meýdança bolup durýandygyny nygtady.

Duşuşykda taraplar söwda-ykdysady, energetika hem-de ulag-tranzit ugurlaryndaky hyzmatdaşlygyň ösdürilişiniň mümkinçiliklerini ara alyp maslahatlaşdylar. 

Prezidentler duşuşygyň ahyrynda Türkmenistanyň we Gazagystanyň arasynda strategik hyzmatdaşlygyň ösdürilmegine ygrarlydyklaryny tassykladylar.

BMG-niň LLDC3 halkara konferensiýasy dünýäniň ýolbaşçylaryny, hökümet baştutanlaryny we abraýly guramalaryň wekillerini bir ýere jemläp, şu ýylyň 8-nji awgustyna çenli dowam eder.