2025-nji ýylyň 5–8-nji awgusty aralygynda Awazada geçirilen Deňze çykalgasy bolmadyk ösüp barýan ýurtlar boýunça BMG-niň üçünji maslahaty (LLDC3) halkara metbugatyň üns merkezinde boldy. Bu barada Türkmenistanyň resmi metbugat serişdeleri ýekşenbe güni habar berdi.

“EU Reporter” neşiri, maslahatyň geçirilýän ýeri hökmünde Türkmenistanyň saýlanylmagynyň ýurduň halkara hyzmatdaşlygynda we ulag geçelgelerini ösdürmekde strategik ähmiýete eýedigini belleýär.

“Kazinform” we “Sinhua” habar gulluklary bolsa, Awazada kabul edilen, infrastrukturany döwrebaplaşdyrmaga, söwdany ýeňilleşdirmäge we howa şertlerine durnuklylygy pugtalandyrmaga  gönükdirlen resminamalaryň ähmiýetini belledi. “Anadolu” agentligi foruma, deňze çykalgasy bolmadyk ýurtlaryň ykdysady mümkinçiliklerini açýan möhüm ädim hökmünde baha berdi.

“Mir” teleýaýlymy we AzVision.az portaly duşuşygyň üstünlikli geçmegini Türkmenistanyň hemişelik bitaraplyk syýasaty bilen baglanyşdyrdy. “News Central Asia” bolsa BMG-niň Baş sekretary Antoniu Guterrişiň ykdysadyýeti diwersifikasiýalaşdyrmak we sanly infrastrukturany ösdürmek baradaky çykyşyna salgylandy.

BMG-niň maglumatlaryna görä, dünýäde deňze çykalgasy bolmadyk ösüp barýan 32 ýurduň 16-sy Afrikada, 10-sy Aziýada, 4-si Ýewropada we 2-si Latyn Amerikada ýerleşýär. Bu ýurtlarda 500 milliondan gowrak adam ýaşaýar, bu bolsa Ýeriň ilatynyň takmynan 7%-ne deňdir.