Özbegistan Respublikasynyň Prezidenti Şawkat Mirziýoýew Türkmenistanyň Halk Maslahatynyň Başlygy, türkmen halkynyň Milli Lideri Gurbanguly Berdimuhamedowa hem-de Türkmenistanyň Prezidenti Serdar Berdimuhamedowa minnetdarlyk hatlaryny iberdi. Hatda Şawkat Mirziýoýew Türkmenistana saparynyň çäklerinde ýokary döwlet sylagyna — "Hyzmatdaşlygy ösdürmäge goşandy üçin" ordenine mynasyp bolandygy üçin minnetdarlyk bildirdi. Bu barada Türkmenistanyň resmi metbugaty ýekşenbe güni habar berdi.

Şeýle hem, Şawkat Mirziýoýew Awazada geçirilen Deňze çykalgasy bolmadyk ösüp barýan ýurtlar boýunça BMG-niň üçünji maslahatynyň ýokary guramaçylyk derejesini belläp geçdi. Ol bu halkara forumyň hem-de Türkmenistanda giň gerimli özgertmeleriň durmuşa geçirilmeginiň ähmiýetini aýratyn nygtady.

Prezident Mirziýoýew iberen hatynda ykdysady, ulag, medeni we ynsanperwer ugurlarda ikitaraplaýyn hyzmatdaşlygy mundan beýläk-de ösdürmegiň ähmiýetini nygtady hem-de Türkmenistanyň we Özbegistanyň arasyndaky, şol sanda sebitleýin derejesinde hyzmatdaşlygyň üstünlikli has-da ösjekdigine uly ynam bildirdi.

Özbegistanyň Prezidenti Türkmenistanyň ýolbaşçylaryna we türkmen halkyna berk jan saglyk, abadançylyk we täze üstünlikleri arzuw etdi.

Şawkat Mirziýoýewi ýokary döwlet sylagy — “Hyzmatdaşlygy ösdürmäge goşandy üçin” ordeni bilen sylaglamak dabarasy 2025-nji ýylyň 5-nji awgustynda, Awazada geçirilen BMG-niň deňze çykalgasy bolmadyk ösüp barýan ýurtlar boýunça üçünji halkara maslahatynyň çäklerinde geçirildi.