“Awaza” Milli syýahatçylyk zolagynda 5–8-nji awgust aralygynda geçirilen BMG-niň Deňze çykalgasy bolmadyk ösüp barýan ýurtlar boýunça üçünji maslahaty (LLDC3) bilen bagly täzelikleri Ýewropanyň abraýly köpçülikleýin habar serişdelerinde ýaýbaňlandyrmakda Türkmenistanyň Belgiýadaky ilçihanasy işjeň hyzmatdaşlyk alyp bardy.

Çäräniň esasy utgaşdyryjysy hökmünde Türkmenistanyň Daşary işler ministrligi tarapyndan akkreditirlenen žurnalisti Derýa Soýsal çykyş etdi. Onuň tagallalarynyň netijesinde “EU Reporter”, “EU Reflect”, “The Europe Today” ýaly platformalarda 20-den gowrak makala we wideomateriallar ýaýradyldy. Bu barada Türkmenistanyň Belgiýadaky ilçihanasy duşenbe güni habar berdi.

Bir million abunaçysy bolan meşhur “EU Reflect”-iň YouTube-kanalyndaky materiallar aýratyn üns çekdi. Ilçihana LLDC3 forumyny ýokary hünär derejesinde yzygiderli ýaýbaňlandyranlara minnetdarlyk bildirdi.

LLDC3 forumyna dünýäniň birnäçe döwlet we hökümet baştutanlary, 100-den gowrak ýurduň ýokary wezipeli wekilleri, şeýle-de 50-ä töweregi halkara guramalary we 20-den gowrak öňdebaryjy kärhanalaryň wekilleri gatnaşdy. Forumy giňden şöhlelendirmek üçin, 40 döwletden 160-dan gowrak žurnalistler we köpçülikleýin habar serişdeleriniň wekilleri Awaza şäherine geldi.